「我們都是香港說書人」(五) ─ 短頭髮

前言

十三郎:
今次訪問邀請咗一班參加咗之前舉辦嘅「暑期八回連載小說大挑戰」,主要原因係我自己想了解更多浮浮沉沉係香港網上寫作故事嘅本地作者。而今次我主要係針對故事/小說嘅作品,所以我諗咗好耐,用粵文定係用書面語?叫講故佬定係說書人?因為我本身係男,所以對「講故佬」呢個名係無咩所謂,但訪問嘅人有女作者喎!好似唔係有禮貌咁。所以都係用返說書人先。

短頭髮:
作為女作者對「講故佬」呢個名接受到 (甚至幾鍾意XD
係回答之前戴個頭盔先,我對創作呢個圈子唔太了解 (一直都係路人視角,只係有時手痕會寫啲嘢),歡迎指教。

十三郎:
我自己係一個香港網絡上做寫作只有兩年嘅經驗,其實都唔係好了解呢個世界嘅玩法,雖然線下都有十幾年創作經驗,但有好多嘢,唔係話老資格就得,有一套日劇叫「不自然死因研究所」,中堂係其中一個法醫。有一次,佢係法庭上被質疑佢提出嚟嘅實驗報告嘅可信性,理由就係因為另一個法醫有佢五倍嘅解剖經驗,於是中堂就好直接咁講:
「啲發晒霉嘅經驗要嚟做咩?法醫係一直喺到進步緊,講嘅實驗結果。」
(大概係咁嘅意思)
當然,係科學上我到可以黑白分明,但係創作上,我哋又可唔可以咁去判定一個故事作品好定唔好?經驗又為作者帶嚟啲咩成就?

短頭髮:
我自己覺得係創作上經驗唔代表一切,亦絕對唔代表故事嘅好壞。我係某網睇人討論動畫劇情崩壞時有人講過(大概意思 …… 好耐之前嘅事,可能同原句差好遠):「係一個編劇寫出爛片之前,冇人會諗到他會寫爛片出嚟。」反正大概想表達就算編劇(作者)之前經驗再多,好評再多,都有可能一時腦抽筋,寫咗啲爛作出嚟。作為讀者亦唔應該盲目,一味撐名家、老作家,有時候要承認佢地係有失水準的時候。
講番你嗰句,如果作者空有經驗,不思進取,在創作路上不會走得遠。同樣的手法、套路寫得多讀者會膩。都寫明係「創」作啦,用番個句「啲發晒霉嘅經驗要嚟做咩?法醫(說故事的手法)係一直喺到進步(改變)緊,講嘅係實驗結果(能否抓緊讀者的心)。」(指的係商業上,文學上唔知道適唔適用) (p.s. 雖然話要抓緊讀者的心,但我係拒絕快餐式作品) 不過當然唔係完全否定經驗的意義,創作者們是需要好好吸收經驗,繼而繼續進步 (做到邊種程度,也很視乎作者對自身的要求。我自己寫得開心,過到心理關口就得啦,唔理咁多。

十三郎:
點解你會參加呢次連載小說(暑期八回連載小說大挑戰)?覺得連載小說有咩特別?

短頭髮:
都係嗰啲老生常談。想嘗試用文字說故事,練練文句,賺多啲經驗讓自己能隨心所欲地表達所想。還有和 Penana 的各位交流,睇睇自己有咩不足,見多識廣。

十三郎:
你覺得香港呢個地方,除咗網上,會唔會有其他途徑發展連載小說?實體書合定本、月刊、閱讀會、教學寫作班等等。

短頭髮:
充滿期望,有不確定性,未知的。有些作者可能因讀者的反響臨時改劇情,仲有腰斬的可能。呢個問題對於我呢個路人甲嚟講有啲難答。我覺得閱讀會會有用啲,大家互相分享想法,增強社區對連載小說的討論度,吸引大家的注意,讓大家感受連載小說魅力。

十三郎:
你係呢次嘅比賽到(暑期八回連載小說大挑戰),想得到啲咩?有咩意見想向作者們提出,鼓勵大家一齊去做某件事/活動/行為?

短頭髮:
同第一題答案類似,我只係想寫一個完整的故事,精不唔精彩唔重要,重要嘅係自己有得著 (例如如何串連零碎的想法、要係咩時候講世界觀設定),呢啲都係做讀者時不會特意思考嘅嘢。利用呢次嘅比賽去比自己嘗試、體會。可能呢啲對於平日寫開文嘅各位不算啲咩,但對我嚟講呢啲都係得著,亦係我想得到嘅嘢。大家加油,莫忘初衷!

十三郎:最後,對將來有咩諗法?

短頭髮:
個人嚟講就係嘗試、嘗試、再嘗試。短期上想寫好新故事,將某幾個很想寫的情節寫出來。目前未肯定會唔會深入創作圈子,希望未來在各種嘗試後能給自己一個答案。
亦希望 Penana 將來的閱讀/寫作風氣能維持甚至變得更好。以及香港的創作風氣能變得更好。
再一次多謝短頭髮嘅訪問!希望大家的訊息也能傳到讀者的面前,能夠讓讀者了解他們更多!

發佈留言

發佈留言必須填寫的電子郵件地址不會公開。 必填欄位標示為 *