前言
十三郎：
今次訪問邀請咗一班參加咗之前舉辦嘅「暑期八回連載小說大挑戰」，主要原因係我自己想了解更多浮浮沉沉係香港網上寫作故事嘅本地作者。而今次我主要係針對故事/小說嘅作品，所以我諗咗好耐，用粵文定係用書面語？叫講故佬定係說書人？因為我本身係男，所以對「講故佬」呢個名係無咩所謂，但訪問嘅人有女作者喎！好似唔係有禮貌咁。所以都係用返說書人先。
3D八爪魚：
講故佬同說書人比，當然係說書人比較好聽，感官上亦比講故佬專業一啲。始終粵語『佬』尼個字帶有貶意。
十三郎：
我自己係一個香港網絡上做寫作只有兩年嘅經驗，其實都唔係好了解呢個世界嘅玩法，雖然線下都有十幾年創作經驗，但有好多嘢，唔係話老資格就得，有一套日劇叫「不自然死因研究所」，中堂係其中一個法醫。有一次，佢係法庭上被質疑佢提出嚟嘅實驗報告嘅可信性，理由就係因為另一個法醫有佢五倍嘅解剖經驗，於是中堂就好直接咁講：
「啲發晒霉嘅經驗要嚟做咩？法醫係一直喺到進步緊，講嘅實驗結果。」
(大概係咁嘅意思)
當然，係科學上我到可以黑白分明，但係創作上，我哋又可唔可以咁去判定一個故事作品好定唔好？經驗又為作者帶嚟啲咩成就？
3D八爪魚：
尼個世界真係有天才存在，天才可以用一日達到凡人用十年時間先到達既領域。但咁唔代表常人一定會輸比天才。只要有足夠既經驗，紮實既基礎，平凡既故事都可以好精彩。我覺得作者們都係係森林中屬找寶藏既獵人，天才能夠一步登天，凡人不停試誤，踩入陷阱，碌落山崖，搞到滿身泥濘，得到教訓既獵人靠經驗知道邊到唔行得，邊到係捷徑，最後揾到寶藏。
十三郎：
點解你會參加呢次連載小說(暑期八回連載小說大挑戰)？覺得連載小說有咩特別？
3D八爪魚：
會參加係為左刷存在感，投稿創挑得到既讚好同閱覽數比獨立發佈要多。長篇連載小說真的很考作者耐心，因為作者會進步，會不停諗到新野，漸漸覺得原先個故事好差，作者無法更好地發揮，最後對故事失去信心，就此爛尾。所以我覺得短篇連載會更好，一個故事為作者當時功力既總覽，而且即使寫衰左都無咁肉痛。因為下個會更好。
十三郎：
你覺得香港呢個地方，除咗網上，會唔會有其他途徑發展連載小說？實體書合定本、月刊、閱讀會、教學寫作班等等。
3D八爪魚：
連載小說尼回事，網絡連載已經係最佳途徑。一來免費，二來方便。搭車或食飯，上堂太悶，等女朋友買衫，閒時攞手機出來碌兩下，比實體書方便太多。以現今科技來講，網絡已是最好既載體。
十三郎：
你係呢次嘅比賽到(暑期八回連載小說大挑戰)，想得到啲咩？有咩意見想向作者們提出，鼓勵大家一齊去做某件事/活動/行為？
3D八爪魚：
無他，就係所有作者想要既野，曝光率。以此次創挑為契機，令讀者產生：『尼條友寫野好有趣。』既諗法，然後去拜讀其他作品。簡單講就係為左宣傳效果。
十三郎：最後，對將來有咩諗法？
3D八爪魚：
將來打算做佛系作家，不找出版社投稿，緣份到了就會有人拍博頭。當然，也想和其他作者合作，組成同人社團發表作品。總之，一切隨緣。
再一次多謝3D八爪魚嘅訪問！希望大家的訊息也能傳到讀者的面前，能夠讓讀者了解他們更多！