「我們都是香港說書人」(三) ─ 萬歲森林

前言

十三郎:
今次訪問邀請咗一班參加咗之前舉辦嘅「暑期八回連載小說大挑戰」,主要原因係我自己想了解更多浮浮沉沉係香港網上寫作故事嘅本地作者。而今次我主要係針對故事/小說嘅作品,所以我諗咗好耐,用粵文定係用書面語?叫講故佬定係說書人?因為我本身係男,所以對「講故佬」呢個名係無咩所謂,但訪問嘅人有女作者喎!好似唔係有禮貌咁。所以都係用返說書人先。
我自己係一個香港網絡上做寫作只有兩年嘅經驗,其實都唔係好了解呢個世界嘅玩法,雖然線下都有十幾年創作經驗,但有好多嘢,唔係話老資格就得,有一套日劇叫「不自然死因研究所」,中堂係其中一個法醫。有一次,佢係法庭上被質疑佢提出嚟嘅實驗報告嘅可信性,理由就係因為另一個法醫有佢五倍嘅解剖經驗,於是中堂就好直接咁講:
「啲發晒霉嘅經驗要嚟做咩?法醫係一直喺到進步緊,講嘅實驗結果。」
(大概係咁嘅意思)
當然,係科學上我到可以黑白分明,但係創作上,我哋又可唔可以咁去判定一個故事作品好定唔好?經驗又為作者帶嚟啲咩成就……

萬歲森林:
要判定一個作品好與壞,完全是個人的喜好問題或許諾貝爾文學獎會有一些得獎準則,可能會較重視反映社會,揭露人性之類……另一些獎項又會有自己的準則,例如會較重視創作性,感染力之類,例如一班評審之中,大部份都是喜愛推理的男士,那麼愛情小說便自然處於劣勢。
十三郎:
點解你會參加呢次連載小說(暑期八回連載小說大挑戰)?覺得連載小說有咩特別?

萬歲森林:
未玩過,所以想試下。我覺得連載小說最特別係要度一個令人想追看嘅結尾,就好似電視劇咁,每集嘅結尾一定要吸引觀眾想追落去,當然,係好難掌握嘅。

十三郎:
你覺得香港呢個地方,除咗網上,會唔會有其他途徑發展連載小說?實體書合定本、月刊、閱讀會、教學寫作班等等。

萬歲森林:
我認為網上小說喺香港正急速發展,只係而家宣傳力度不足,或者講,係啲人唔知點宣傳,又或者唔想放資源去宣傳,可能同現有書商、書店、印刷商嘅利益有關。假如可以將印體體書嘅資源放在網站推廣上,相信看網上小說嘅人會倍增。當然,最初一定要邀請一啲知名作家加盟助威,打響頭炮。至於出實體書合訂本絕對係一個加強宣傳嘅渠道,書唔使印得多,但一定要有,因為放喺書店係最直接接觸讀者方法,好過你大賣港鐵廣告。
至於月刊、閱讀會同教學寫作班,要等作家出咗名先至有得搞。除非你本月刊有金鏞、倪匡之類嘅名牌坐鎮,否則好難持久。

十三郎:
你係呢次嘅比賽到(暑期八回連載小說大挑戰),想得到啲咩?有咩意見想向作者們提出,鼓勵大家一齊去做某件事/活動/行為?

萬歲森林:
參加今次比賽純粹想挑戰下自己,冇想過會得到啲咩噃….或者係認識到幾個志同道合嘅作者啦!我覺得多搞創作挑戰係好事,只要題材合適,我會再參與嘅。
我覺得呢個網站(Penana)應該搞多啲活動(例如裝app推廣),向外推廣一下,向內就要加強作者同嘅聯繫,始終網站嘅內容完全係作者無償奉獻,網站應該搞多啲推廣作者嘅活動,例如幫多啲好嘅作品推出實體書,搞多啲小說比賽。當然,都可以搞同某啲機構合作嘅指定寫作題材,但係呢種合作只不過係廣告公司同客戶之間嘅合作,對作者似乎冇乜好處,他日隻GAME出咗,GAME公司會唔會專登介紹個故事原作者係乜水呢?真係唔知。所以,若果唔好好管理和推廣,作者就會逐漸流失,倒不如返去連登?又或者去台灣小說網站?
當然,我係因為珍惜香港有一個咁認真嘅小說平台,才來湊熱鬧,希望呢個網站、以至整體網絡連載小說都可以日益昌盛啦!
再一次多謝萬歲森林嘅訪問!希望大家的訊息也能傳到讀者的面前,能夠讓讀者了解他們更多!

Leave a Comment

發佈留言必須填寫的電子郵件地址不會公開。 必填欄位標示為 *