行乞藝術

最近呢兩個月,轉咗工作嘅地點,喺返工嘅時候會穿過一條隧道,而個度不定期會有個乞兒賣藝。

喺喇⋯⋯其實佢算係乞食?定係賣藝?我都唔係好清楚。佢又真係成個乞兒裝咁,不過又有一個細細哋嘅擴音喇叭,載住Head-set,一露表演吹口琴。而佢特別嘅地方,係會一邊點頭,一邊唔啱Bit咁吹。一直以嚟,我都會覺得,你用力吹先會點頭俾力,但佢點頭嘅速度大概可以係每四秒三下,好似DJ打碟咁,不過係吹緊慢版嘅「月亮代表我的心」,而佢嘅努力仲會得到回報添架!

據我每日返工經過隧道個十秒,我每次都會聽到散銀兜到會有銀跌落去嘅聲。除非係佢雙手吹吹下口琴,唔知邊度伸隻手出嚟攪下啲銀,又或者佢部擴音機係會定期做跌銀嘅音效,如果唔係,以呢個每十秒跌一蚊嘅收入嚟講,過多三五七年,佢夠錢買新起嘅私樓!唔係首期,係一次過俾。

我會幻想到個,佢會好似個聖誕老人咁,抬住一大袋一蚊,用力推開間地產公司嘅大門,大喝一聲:

「我嚟出糧俾你呀!」

呢個時候地產舖個Sales就會好興奮咁迎接佢。不過唔夠一秒,當個Sales同個乞兒眼神接觸之後,佢會呆一呆先講:

「你咪成日係隧道吹口琴嗰個阿伯?」

「係呀!後生仔,多得你同啲同事、街坊每日俾一蚊我,幾年後我終於夠錢買樓喇!所以我咪特登嚟多謝你哋囉!」

其實諗返華子講嘅故事就知,係街到行乞,識吹一兩首歌就可以買到樓,個問題係,點解佢做咁少嘢都可以買到樓,街頭藝人又唱又跳,甚至玩埋雜技,講下棟篤笑,只能夠得到大家嘅掌聲?派Like?(當然宜家Likecoins有得分)於是我就開始探討呢個問題。

街頭賣藝嘅人,最主要佢哋嘅目的係咩?其實佢哋唔係為錢,因為佢哋好多都係有夢想,覺得自己係一個超凡嘅表演者,佢擁有嘅天賦就係「能人所不能忍」的!即係好似要同啲跳大媽舞嘅女人爭地盤、要同啲宗教團體鬥大聲、又要隨時面對保安員即興加入表演唱雙黃,真係少啲才能你都好難有個地方做自己鍾意嘅嘢,更重要嘅係,如果你俾錢佢哋,只會令佢哋犯法,咁又抹殺咗一個表演者嘅機會。所以大家一定唔會俾佢哋,甚至俾錢就好似貶低咗佢哋咁。

但乞兒就好唔同,你好清楚佢哋真係要錢,就算你食lunch食唔晒,放低包薯條係到,佢明明啞嘅都會鬧你一鑊,阻X住晒。不過其實都可能唔啱口味,你俾碗花膠個佢可能都會飲兩啖。乞兒係街邊搵食一定只係為咗錢,所以佢俾起賣藝嘅人會更加積極,佢會為咗你個一蚊,話之你蕭邦定貝多芬,佢都可以係擴音機到播俾自己聽之餘再吹俾你聽,甚至可以用口琴吹段弘樂四重奏出嚟。不過如果要佢哋吹進擊的巨人就真係難啲,因為吹啲太年青嘅歌,會俾人以為佢哋係賣藝,咁大家就會尊重佢而唔會俾錢佢。呢一啲都係行乞需要嘅藝術!

另外你有時會見到街頭賣藝嘅人會同保安據理力爭,為嘅可能係想高調俾人知佢玩緊街頭藝術,又或者覺得自己嘅夢想俾制度壓迫,咩都好,總知就一定要堅持到底!但乞兒唔洗,佢哋係為錢,一個幾毫,轉個彎就賺到返嚟,洗同佢嘈?而且佢哋兩邊都係為錢,只不過保安收月薪,乞兒係Freelance,大家唔同出糧方式即,無抵觸,收咗工大家仲可以一齊食口煙添。

不過無論乞兒又好、街頭賣藝又好,大家都會有共同嘅敵人。就係食環同警察。

街頭賣藝就麻煩好多,佢哋普遍都係好多工具幫自己表演,為咗要做好個表演,好難就咁走咗去。但乞兒就唔同,可以好瀟灑。另外我都見過有招幾work,佢會選擇好一個地方先開工,第一,要有阿婆擺檔嘅地方!阿婆要喺附近,又遠少少嘅地方做小販賣嘢,最少無食環嘅人捉到你!大家都知,食環係最驚阿婆,每次都用十幾廿人去圍住佢,咁佢仲邊有人手去捉你行乞先?另一個地方係元氣壽司外面,你撳定張等位飛,乞乞下見到有警察行過嚟,首先都唔洗太驚,因為大多數佢哋都只係行過唔理,帶你返去又要落簿,阿Sir前世未做過要搵嘢嚟做呀?不過又真係難保會遇到啲熱血幹探要追數,都會查下你身份証,問你做咩係到行乞,咁到時你都可以比張飛阿sir睇,等位食飯即……

呢啲手法,如果你係街頭賣藝,你真係做唔出,就算想做,你最後都會忍唔係爆阿Sir、食環、保安一句:「我為夢想可以去到好盡架!你得唔得呀?」個份傲氣係掩飾唔到,但乞兒就簡單好多:「一兩蚊即,俾條路行下?你估真係買到樓咩?」

作者:多媒體廢作人

作品:2016《叛神軍團》、2016《Slow Music》、2016《筆示驅魔傳》、2017《DSE幻想校園》、2017《格子控的執著》、2018《混個半神當就這麼難嗎?》。個人網:https://andy729hui.like.community/

發佈留言

發佈留言必須填寫的電子郵件地址不會公開。 必填欄位標示為 *